Cronfa Datblygu

Trosolwg

Mae Cronfa Ddatblygu Media Cymru yn cynnig hyd at £50,000 i unigolion a busnesau yng Nghymru ymchwilio a datblygu prosiectau arloesol sy’n dangos potensial clir ar gyfer cynnyrch, profiad neu wasanaeth diriaethol yn sector y cyfryngau.

Rydyn ni eisiau ariannu syniadau sydd â manteision economaidd hirdymor i sector y cyfryngau ym Mhrifddinas-Ranbarth Caerdydd neu Gymru.

Os byddan nhw’n llwyddiannus, bydd yr ymgeiswyr yn elwa o bedair sesiwn orfodol (cyfanswm o wyth awr), yn ogystal â sesiwn ddewisol (tair awr) gyda’r ymgynghoriaeth dylunio blaenllaw a chyfleuster ymchwil gymhwysol PDR.

Hefyd bydd pedair sesiwn cymorth orfodol (cyfanswm o wyth awr) gan Sefydliad Alacrity a fydd yn rhannu arbenigedd datblygu busnes a masnacheiddio.

Y Cwmpas

Gall eich prosiect ganolbwyntio ar un neu fwy o’r canlynol:

• Fformatau cyfryngau newydd a datblygu cynnwys arloesol
• Cynhyrchu cyfryngau datblygedig, gan gynnwys cydgyfeirio cynhyrchu rhithwir a chynhyrchu traddodiadol
• Modelau busnes a phrosesau cynhyrchu cyfryngau newydd a chynhwysol
• Sero net a datgarboneiddio’r sector sgrin (mae croeso arbennig i brosiectau sy’n ymateb i ganfyddiadau Cynllun Trawsnewid Bargen Newydd y Sgrin i Gymru
• Adrodd straeon drwy dechnolegau ymgolli realiti estynedig (XR), gan gynnwys realiti rhithwir (VR), realiti cynyddol (AR) a realiti cymysg (MR)
• Creu cynnwys gemau fideo a’u cynhyrchu, gan gynnwys cydgyfeirio â chyfryngau eraill
• Deallusrwydd Artiffisial (AI) a thechnolegau eraill fel offer ar gyfer cynhyrchu’r cyfryngau
• Creu lleoedd, gan gynnwys twristiaeth ddiwylliannol a’r cyfryngau
• Cynhyrchu dwyieithog ac amlieithog
• Newyddion a gwybodaeth gyhoeddus
• Cynhyrchu cerddoriaeth, llais a sain, gan gynnwys perfformio a dosbarthu.

Ni fwriedir i’r rhestr hon gynnwys popeth ac mae’r posibiliadau’n eang.

Nid yw’r Gronfa Datblygu yn addas ar gyfer y canlynol:

• Datblygu cynnwys generig (er enghraifft, datblygu ffilmiau byr, ffilmiau mawr neu gynlluniau peilot teledu sy’n cydymffurfio â genres safonol ac arferion adrodd straeon)
• Datblygu busnes cyffredinol, neu
• Gomisiynau celf untro.

Hygyrchedd 

Os oes gennych chi ofynion penodol a fyddai’n gwneud y broses ymgeisio’n fwy hygyrch (fel cyngor, cyfarwyddiadau neu gymorth darllen), neu os hoffech chi drafod fformatau eraill (fideo neu sain, naratif llais, ffont mawr, testun plaen neu iaith arall), anfonwch e-bost at media.cymru@caerdydd.ac.uk neu ffonio 02922 511 434.

Dyddiadau Allweddol

• 3 Chwefror 2025 – Ceisiadau ar agor
• 28 Chwefror 2025 – Ceisiadau’n cau am hanner dydd: sylwch ni dderbynnir ceisiadau ar ôl yr amser hwn
• 14 Ebrill 2025 – Ymgeiswyr yn cael gwybod (dylai ymgeiswyr nodi y gall gymryd hyd at 5 wythnos i gontractau gael eu cyhoeddi)
• 9 Mehefin 2025 – Prosiectau’n dechrau.

Meini prawf cymhwysedd

• Mae eich cwmni neu’ch gwaith wedi’i leoli yng Nghymru
• Mae gennych syniad ymchwil a datblygu wedi’i fynegi’n glir
• Rydych chi’n gweithio yn niwydiant cyfryngau Cymru, neu mae eich syniad o fudd uniongyrchol i ddiwydiant cyfryngau Cymru
• Gallwch neilltuo amser ac ymdrech i gwblhau prosiect ymchwil a datblygu rhwng mis Mehefin 2025 a Mai 2026
• Dim ond un cais y byddwn yn ei dderbyn a’i ariannu fesul cwmni/sefydliad fel arweinydd prosiect

Diffiniad Media Cymru o Ymchwil a Datblygu

Diffinnir gweithgareddau ymchwil a datblygu fel gwaith creadigol a systematig a wneir i fynd i’r afael â heriau ac i greu cynhyrchion, gwasanaethau, prosesau neu brofiadau newydd neu well.

Gan ystyried cyd-destun y cyfryngau, gallai hyn olygu archwilio, profi neu arbrofi gyda thechnoleg newydd fel realiti estynedig, deallusrwydd artiffisial neu rithgynhyrchu. Gallai hefyd olygu archwilio ffyrdd o weithio sy’n flaengar, yn decach ac yn fwy cyfeillgar i’r blaned. Gallai gynnwys profi dulliau newydd o gynhyrchu, dosbarthu a phrofi cynnwys, neu ffyrdd newydd o gyrraedd cynulleidfaoedd a bod yn fwy sensitif i’w hanghenion a’u gofynion.

Dyma’r math o brosiectau ymchwil a datblygu rydyn ni’n chwilio amdanynt:

• Gwreiddiol: byddant yn seiliedig ar gysyniadau a damcaniaethau gwreiddiol, nid rhai amlwg
• Creadigol: byddant yn defnyddio dulliau arbrofol ac yn cynhyrchu canfyddiadau newydd
• Ansicr: byddant yn dechrau gyda rhywfaint o ansicrwydd ynghylch y canlyniadau terfynol
• Systematig: byddant yn seiliedig ar ddull gweithredu sydd wedi’i gynllunio a’i gyllidebu
• Trosglwyddadwy: byddant yn cynhyrchu canlyniadau y gellir eu hatgynhyrchu er mwyn sicrhau manteision ehangach.

Pileri Media Cymru

Rydyn ni’n awyddus i gefnogi prosiectau sy’n mynd i’r afael â rhai agweddau ar ein pedwar piler strategol, neu bob un ohonynt:

• Gwyrdd – lleihau effaith amgylcheddol y sector
• Teg – creu sector teg, cyfartal ac amrywiol
• Byd-eang – cynyddu cydweithrediadau rhyngwladol
• Twf – sbarduno twf a chynhyrchiant drwy Ymchwil a Datblygu.

Lansio’r Gronfa Datblygu

Ar ddydd Llun 10 Chwefror, ymunwch â Media Cymru a wrth iddyn nhw lansio eu Cronfa Datblygu 2025. Rhagor o wybodaeth ac archebwch eich lle. 

Unrhyw gwestiynau?

Ymunwch â’n gweminar friffio (Dydd Iau 13 Chwefror, 11am) i gael gwybod rhagor am y Gronfa Datblygu, siarad â’n cynhyrchwyr yn Media Cymru a gofyn cwestiynau.

Gwneud cais

Darllenwch a lawrlwythwch y ddogfen ganllaw cyn gwneud cais – mae’n cynnwys rhagor o wybodaeth, manylion ymgeisio a meini prawf cymhwysedd.

Os ydych chi’n dymuno paratoi eich atebion all-lein cyn gwneud cais, mae’r cwestiynau ymgeisio allweddol i’w gweld yn y ddogfen ganllaw.

Nodiadau Canllaw Cronfa Datblygu 2025 (Word)

Nodiadau Callow Cronfa Datblygu 2025 (PDF)

Rhaid llenwi a chyflwyno pob cais ar-lein drwy ein gwefan. Ni allwn dderbyn ceisiadau mewn fformatau eraill.

Bydd ceisiadau ar agor dydd Llun 3 Chwefror.