Partneriaid consortiwm media cymru yn ymuno i wneud sector y cyfryngau yn fwy cynhwysol ar gyfer pobl ddawnus sy’n fyddar, yn anabl ac yn niwroamrywiol

“Uwchgynhadledd Dyfodol Hygyrch” agoriadol i arddangos dulliau blaengar o drin cynwysoldeb

Mae consortiwm Media Cymru wedi dod â chynghreiriaid academaidd a diwydiant at ei gilydd i wneud sector y cyfryngau yn fwy cynhwysol ac amrywiol, ac mae bellach ar fin cynnal yr “Uwchgynhadledd Dyfodol Hygyrch” gyntaf erioed i dynnu sylw at ba mor bell y mae’r diwydiant wedi dod i ddarparu ar gyfer amrywiaeth eang o bobl ddawnus sy’n D/byddar, yn anabl ac yn niwroamrywiol (DDN) mewn gyrfaoedd cynhyrchu ym maes y cyfryngau.

Gyda’r Gemau Paralympaidd ym Mharis yn dangos sut mae athletwyr o bob cwr o’r byd yn ehangu terfynau posibilrwydd dynol, mae Media Cymru a phartneriaid consortiwm Prifysgol De Cymru yn paratoi i ddatgelu dulliau newydd sbon o weithio gyda phobl D/byddar, anabl a niwroamrywiol y tu ôl i’r sgrin mewn digwyddiad unigryw a gynhelir yng Ngholeg Brenhinol Cerdd a Drama Cymru ar 10 Medi.

Gydag 1 o bob 4 o boblogaeth Cymru bellach yn nodi eu bod yn anabl, a llai nag 8% o gynrychiolaeth D/byddar, anabl a niwroamrywiol (DDN) ar y sgrin ac oddi arni, dywed trefnwyr yr uwchgynhadledd y bydd yr uwchgynhadledd yn galluogi cyfranogwyr o bob rhan o sector y cyfryngau i ddod yn fwy hyderus o ran anabledd, cael gwell dealltwriaeth o sut i gyflogi, cynnwys, hyfforddi a chefnogi talent DDN, a dod o hyd i adnoddau a chyllid i sicrhau cynyrchiadau mwy hygyrch.

Trwy gydol yr uwchgynhadledd, bydd gweithwyr proffesiynol y diwydiant sgrin yn dod at ei gilydd i drafod hygyrchedd, cynhwysiant a chynrychiolaeth ym mhob agwedd ar gynhyrchu sgrin, gan archwilio arfer gorau a chlywed gan nifer o bobl greadigol anabl a fydd yn rhannu eu gwybodaeth a’u profiad.

Mae’r actores Andria Doherty (It’s a Sin, The Way a Lost Boys & Fairies) yn anabl ac yn rhannol fyddar a bydd yn rhannu ei phrofiad fel prif siaradwr yn yr uwchgynhadledd. Mae hi’n rhannu:

“Mae’n bwysig iawn bod y rhai sy’n gwneud penderfyniadau yn y diwydiant yn deall ble mae’r problemau a’r rhwystrau ar gyfer pobl ddawnus sy’n Fyddar, yn Anabl ac yn Niwroamrywiol yng Nghymru, gan hyrwyddo trafodaeth ac anelu at wneud newidiadau er mwyn rhoi chwarae teg i bawb.

“Mae cynifer o bobl greadigol talentog yng Nghymru, o flaen y camera a’r tu ôl iddo, ac eto mae’r cyfleoedd i ni yn gyfyngedig iawn. Nid yw addasiadau rhesymol yn cael eu gwneud bob amser, yn ystod y broses ddethol ac wrth weithio ar setiau.

“Rwy’n edrych ymlaen yn fawr at fod yn rhan o’r trafodaethau yn ystod y dydd fel bod pawb yn dysgu gyda’i gilydd ac yn mynd ati i wneud y newidiadau sydd eu hangen. Rwy’n gyffrous i glywed am lwyddiannau eraill sy’n gweithio mewn gwahanol rannau o’r diwydiant. Rwy’n siŵr y bydd yn ddiwrnod llawn gwybodaeth a chynhyrchiol iawn.”

Mae Kate O’Reilly yn ddramodydd ac yn awdures. Mae’n ymuno ag Andria fel prif siaradwr yn yr uwchgynhadledd ac yn ychwanegu:

“Mae’r cyfryngau cynhwysol sy’n cynrychioli ac yn adlewyrchu amrywiaeth ein cenedl, sy’n dathlu gwir ehangder dawn – sy’n aml yn cael ei hanwybyddu – yn sicrhau sioeau teledu a ffilmiau gwell i bawb. Mae Dyfodol Hygyrch yn fenter wych lle gallwn ddod at ein gilydd, dysgu oddi wrth ein gilydd a symud ymlaen yn eofn i sector tecach a mwy teg…”

Mae Sally Lisk-Lewis o Brifysgol De Cymru yn rhannu sut y cafodd y syniad am yr uwchgynhadledd uchelgeisiol ei greu:

“Cysylltodd yr awdur Kaite O’Reilly, yr actores Andria Doherty a Sara Beer (Cyfarwyddwr Newid, Ramps) ataf – menywod â phrofiad byw o weithio yn y diwydiannau creadigol fel pobl greadigol anabl. Roedd y tri yn rhwystredig oherwydd diffyg cynrychiolaeth pobl anabl ar y sgrin ac oddi arni yn ein sector. Fel rhywun sydd wedi colli cryn dipyn o’m clyw, roedd yr hyn a oedd ganddynt i’w ddweud am yr heriau parhaus sy’n wynebu’r gymuned fyddar, anabl a niwroamrywiol yng Nghymru wedi taro tant go iawn.

“Mae cymaint o waith da eisoes ar waith yng Nghymru i amrywio’r naratif ar y sgrin/oddi ar y sgrin yng Nghymru, ac rydym yn bwriadu ei arddangos yn yr uwchgynhadledd. Ond mae llawer mwy y gallwn ac y dylem fod yn ei wneud i ganiatáu i bawb ffynnu yn ein sector.  Mae dylunio cynhwysol o fudd i bob un ohonom, o’r rhai sydd â chyfrifoldebau gofalu neu gyflyrau iechyd dros dro, i unigolion sy’n profi galar poenus neu iechyd meddwl gwael.

“Mae’r digwyddiad hwn yn cynnwys ‘sut’ i fod yn hygyrch yn ogystal ag yn archwilio ‘pam’ y mae o fudd creadigol i gynyrchiadau i gynnwys storïwyr, cast a chriw anabl. Rwy’n hynod falch o’r rhaglen y mae ein tîm bach ym Mhrifysgol De Cymru wedi’i rhoi ar waith – a’r siaradwyr a’r dosbarthiadau meistr anhygoel rydyn ni wedi’u trefnu ar gyfer yr uwchgynhadledd agoriadol hon. Gyda gweledigaeth Media Cymru ar gyfer twf economaidd cynaliadwy, teg a gwyrdd, mae’n dangos yr hyn y gellir ei gyflawni pan fydd partneriaid y diwydiant yn dod at ei gilydd…”