Cyhoeddwyd ar 17.02.2025

Atlas Economi Greadigol Cymru – ffordd newydd o fapio’r ecosystem greadigol yng Nghymru  

Heddiw, mae ymchwilwyr o Ganolfan i’r Economi Greadigol ym Mhrifysgol Caerdydd wedi cyhoeddi ffordd newydd sbon o ddatgelu’r rhwydwaith eang o fusnesau a gweithwyr llawrydd creadigol yng Nghymru.  

Mae Atlas Economi Greadigol Cymru wedi’i ddatblygu gan Ganolfan i’r Economi Greadigol ym Mhrifysgol Caerdydd. Mae’n dilyn prototeip cynharach a grëwyd yn 2020 yn rhan o raglen ymchwil a datblygu Clwstwr (2018-2023). Ariannwyd y rhaglen hon, a oedd yn werth £4m, gan Gyngor Ymchwil y Celfyddydau a’r Dyniaethau (AHRC). Yn 2023-2024, aeth y Ganolfan Economi Greadigol ati i ddiweddaru’r Atlas a’i ehangu gyda chymorth Cymru Greadigol a rhaglen Media Cymru.  

Gan ddefnyddio data a gyfunwyd o sawl ffynhonnell, mae’r “Atlas Creadigol” yn rhoi darlun daearyddol unigryw o ecosystem greadigol Cymru. Mae’r map rhyngweithiol yn caniatáu i ymwelwyr archwilio naw sector creadigol gwahanol a naw math o ofod creadigol. Ar ben hynny, mae’n mapio mathau eraill o rwydweithiau creadigol ar draws Cymru. Gall ymwelwyr edrych yn fanylach ar ranbarthau a chodau post penodol drwy chwyddo’r ddelwedd, neu ei ddad-chwyddo i gael syniad o ble mae gweithgarwch creadigol wedi’i glystyru ledled Cymru. Yn ôl ymchwilwyr Canolfan i’r Economi Greadigol, yr Atlas newydd hwn yw’r mwyaf cynhwysfawr o’i fath yn y DU. Mae’n helpu i chwalu seilos data ar draws ecosystem greadigol Cymru i roi darlun cyflawn a chywir o’r diwydiannau creadigol ar draws Cymru. 

Bydd yr Atlas Creadigol yn parhau i esblygu ac yn ymgorffori unrhyw data newydd a ddaw i’r amlwg. Canolfan i’r Economi Greadigol, gyda chymorth 4Global, sy’n rheoli cartref ar-lein yr Atlas. 

Dywedodd yr Athro Marlen Komorowski, Uwch-gymrawd Ymchwil i Media Cymru:  

“Yng Nghanolfan i’r Economi Greadigol, mae wedi dod i’r amlwg i ni pa mor bwysig yw’r diwydiannau creadigol erbyn hyn o ran ysgogi twf yng Nghymru. Ac eto, oherwydd diffyg data hygyrch, nid yw hyn yn cael ei werthfawrogi o hyd i raddau helaeth.”  

“Mae cymaint o arloesedd, talent a gweithgarwch yn digwydd ar draws y diwydiannau creadigol yng Nghymru, ond mae’r straeon anhygoel hyn yn aml yn parhau i fod heb eu hadrodd. Yr Atlas Creadigol yw ein hymateb ni i’r her hon – platfform unigol a hygyrch i chwalu seilos data a dangos y gwaith anhygoel sy’n cael ei wneud. Mae hefyd yn cynnig adnodd ymarferol ar gyfer y sector i amlygu mannau busnes, dod o hyd i gyfleoedd hyfforddi, neu gael gwybod am brosiectau ysbrydoledig.” 

 Ariannwyd yr Atlas Creadigol newydd yn rhannol gan Lywodraeth Cymru.  

Dywedodd Joedi Langley, Pennaeth Dros Dro Cymru Greadigol:

“Mae’n wych gweld yr Atlas Creadigol yn cael ei lansio – casgliad o adnoddau hanfodol lle mae modd cael gafael ar wybodaeth hollbwysig mewn un lle. Yn ogystal â chynnwys data gwerthfawr, mae hefyd yn adnodd defnyddiol i bobl a allai fod â diddordeb mewn gwneud gwaith creadigol, gweithwyr llawrydd a darpar gwmnïau sydd am wneud rhywfaint o fusnes yng Nghymru. Bydd yn parhau i dyfu a gwella dros amser, ac rydym yn edrych ymlaen at ei rannu â’n rhanddeiliaid.”  

Cliciwch i weld yr Atlas Creadigol newydd  

Neges flaenorol: Media Cymru yn dyfarnu bron i £140,000 i BBaChau Cymru yn y rownd ddiwethaf o gyllid sbarduno ar gyfer prosiectau ymchwil a datblygu arloesol 

Pob mewnwelediad