Cyhoeddwyd ar 17.02.2025

Media Cymru yn dyfarnu bron i £140,000 i BBaChau Cymru yn y rownd ddiwethaf o gyllid sbarduno ar gyfer prosiectau ymchwil a datblygu arloesol 

Rydyn ni wedi croesawu ei drydedd carfan a’r un terfynol o fusnesau a mentrau bach a chanolig sydd wedi llwyddo i dderbyn cyllid o’r Gronfa Sbarduno ar gyfer ymchwil cam cynnar, datblygu ac arloesi (RD&I).  

Mae bron i £140,000 o gyllid sbarduno wedi’i fuddsoddi mewn 14 o gwmnïau a gweithwyr llawrydd i ddatblygu prosiectau ymchwil a datblygu arloesol (Y&D) yn sector y cyfryngau gan gwmpasu meysydd fel adrodd straeon rhyngweithiol trwy ddefnyddio technolegau a phrofiadau trochi (gan gynnwys rhith-gynhyrchu). realiti estynedig (AR) a deallusrwydd artiffisial (AI)), creu lleoedd a thwristiaeth, darlledu dwyieithog, gemau cyfrifiadurol a datrysiadau cynaliadwy ar gyfer y diwydiant ffilm a theledu.  

Mae’r cyllid yn dilyn dau gylch cyllido blaenorol yn 2023 a 2024, lle dyfarnwyd cyfanswm o dros £350,000 i 36 o brosiectau. 

Mae prosiectau cronfa sbarduno llwyddiannus ar fin cyfrannu at ddiwydiant cyfryngau tecach, gwyrddach ac economaidd gynaliadwy yng Nghymru. 

 Cynhelir y prosiectau rhwng mis Chwefror a mis Mehefin 2025, gyda chymorth ac arweiniad gan bartneriaid Media Cymru PDR ac Alacrity.   

Dywedodd Rheolwr Cronfa Media Cymru, James Atkinson:

“Rydym yn edrych ymlaen at fuddsoddi yn y garfan cronfa sbarduno newydd hon ac edrychwn ymlaen at weld eu prosiectau ymchwil a datblygu yn esblygu dros y misoedd nesaf. Roedd y broses asesu’n gystadleuol iawn, ac mae’r ystod o brosiectau a ariannwyd yn cyd-fynd â phileri Media Cymru (gwyrdd, teg, byd-eang, twf) a’r sector ehangach. Byddwn yn gweithio’n agos gyda nhw, ochr yn ochr â’n partneriaid PDR ac Alacrity Foundation, wrth iddynt gychwyn ar eu teithiau ymchwil a datblygu. Edrychaf ymlaen at weld canlyniadau’r prosiect a meysydd archwilio newydd.” 

Mae ScreenTales yn un o’r prosiectau sydd wedi llwyddo i sicrhau cyllid sbarduno ar gyfer 2025. Mae eu prosiect ymchwil a datblygu’n canolbwyntio ar Fapiau Sain Ambisonig Hygyrch (AAMs) gan ddefnyddio sain realiti rhithwir. Wrth weithio gyda phobl greadigol ddall gan ddefnyddio meicroffon 3D ‘ambisonig’ ScreenTales, fe wnaethon nhw ddarganfod bod y profiad clywedol o’r un ansawdd uchel â’r profiad gweledol gan ddefnyddio gogls realiti rhithwir 8K. Bydd ScreenTales yn datblygu arfer gorau ar gyfer recordio sain realiti rhithwir i’w gwneud yn hygyrch. Bydd yr arfer gorau hwn hefyd yn ffordd ddibynadwy o ddefnyddio sain realiti rhithwir ym mhob math o gyfrwng.

Dyma a ddywedodd Sylvia Strand o ScreenTales:

“Rydyn ni wedi darganfod bod sain 3D ‘gwirioneddol’, sy’n bosibl gyda ‘Dolby Atmos’, yn trawsnewid y profiad gwrando i bobl â nam ar eu synhwyrau. I grynhoi, mae sain 360 o’r radd flaenaf yn wych ar gyfer gwella adloniant, ond mae ganddi’r potensial hefyd i fod yn adnodd hygyrchedd pwerus.

Un arall sydd wedi sicrhau cyllid ar gyfer 2025 yw Campfire Digital. Nod BeOne yw creu mannau trochi arloesol sy’n blaenoriaethu cynhwysiant. Gan fynd ati i gael gwared ar rwystrau a meithrin cysylltiadau dyfnach, bydd BeOne yn paratoi’r ffordd i realiti rhithwir sy’n croesawu pawb ac yn cefnogi anghenion amrywiol mewn mannau creadigol sy’n cael eu rhannu.

Meddai Stephen Banbury, Cyd-sylfaenydd a Chyfarwyddwr Campfire Digital:

“Mae gan dechnoleg ymgolli botensial anhygoel i wella creadigrwydd, dysgu a chyfathrebu. Er hynny, i lawer o bobl, nid yw ymgolli yn y profiadau bob amser yn syml. Gall rhwystrau megis sensitifrwydd synhwyraidd, anableddau, allgáu digidol a hygyrchedd wneud cymryd rhan yn anodd neu hyd yn oed yn amhosibl. Rydyn ni’n credu y dylai profiadau trochi fod ar gael i bawb. Gyda chefnogaeth Media Cymru, byddwn ni’n ymchwilio i ddulliau newydd o gynllunio amgylcheddau rhithwir rhyngweithiol ac addasol – rhai sy’n blaenoriaethu defnyddioldeb, creadigrwydd a hygyrchedd o’r gwaelod i fyny.”

Cafodd y cyllid sbarduno ei ddyfarnu i Lily Pad Films ar gyfer eu prosiect Cysylltu: Cysylltiadau Cymreig. Byddan nhw’n trin a thrafod cyfuniad o fideos rhyngweithiol (AR,VR XR, DVDs rhyngweithiol) a drama ymdrwythol i gynnig cyfleoedd creadigol i ddysgu Cymraeg a chymorth i greu mannau newydd, cyhoeddus a chyfarwydd ar gyfer cymunedau lle gallwch chi gysylltu’n rheolaidd. Maen nhw hefyd yn bwriadu cynnig hyfforddiant gyrfaol cynnar i bobl ifanc yn ardal Rhondda Cynon Taf.

Dywedodd Hugh Griffiths, Cyfarwyddwr Lily Pad Films:

“Ar ôl bod ym myd busnes am 16 mlynedd dyma’r cyfle cyntaf dw i wedi’i gael i wneud ychydig o waith ymchwil a datblygu, felly rwy’n edrych ymlaen yn fawr i fod yn rhan o Gronfa Sbarduno Media Cymru. Mae’n wych cael y cyfle i ddatblygu sgiliau a syniadau newydd a’u trosglwyddo i’r gymuned ehangach, yn enwedig pobl ifanc Rhondda Cynon Taf… yn ogystal â cheisio dechrau siarad Cymraeg wrth sgwrsio â phobl!”

Mae Symphonasia, sy’n cynnwys João Saramago, Dr. Owain Llwyd a Stephen Banbury, hefyd ar fin dechrau ar eu taith ymchwil a datblygu. Mae Symphonasia yn trafod sut y gall symud, deallusrwydd artiffisial, celf a cherddoriaeth ddod at ei gilydd mewn man trochi sy’n cael ei rannu. Ac yntau wedi’i ysbrydoli gan luniadau rhyngweithiol a chyfansoddiadau cerddorol, bydd yn harneisio golwg cyfrifiadurol arloesol gyda chymorth deallusrwydd artiffisial i alluogi’r rhai sy’n cymryd rhan i greu a rhannu seinweddau unigryw, gan gyfuno ymadroddion gweledol a cherddorol mewn amser go iawn”.

Dywedodd João Saramago:

“Rwy’n edrych ymlaen yn fawr at weithio ar brosiect sy’n cyfuno technolegau ymgolli â chelf draddodiadol mewn ffordd sy’n gynhwysol ac yn ddathliadol, ac rwy’n gobeithio y bydd Symphonasia yn ychwanegu at y gweithgareddau a digwyddiadau bywiog sy’n digwydd yng Nghaerdydd.”

Dywedodd y Cyfansoddwr, Dr. Owain Llwyd:

“Mae Symphonasia yn gadael i unrhyw un greu cerddoriaeth a delweddau’n reddfol trwy symud. Rwy’n edrych ymlaen at drin a thrafod sut y gall deallusrwydd artiffisial chwalu rhwystrau creadigol, gan wneud mynegiant artistig yn fwy trochol a hygyrch i bawb.”

Cafodd cyllid sbarduno ei ddyfarnu hefyd i Eliot Gibbins a Brett Meader ar gyfer eu cynnig i greu sganiwr 3D rhatach a gwyrddach ar gyfer effeithiau gweledol ar y set yn y diwydiant ffilm a theledu yng Nghymru. Nod y prosiect yw datblygu sganiwr 3D bach, ecogyfeillgar a chost-effeithiol i’w ddefnyddio ar setiau ffilm a theledu. Bydd yn galluogi actorion ac asedau i gael eu sganio yn y fan a’r lle, gan leihau costau logistaidd, amser cynhyrchu ac effaith amgylcheddol. Bydd hyn yn symleiddio’r broses o greu effeithiau gweledol o ansawdd uchel a hyrwyddo proses fwy cynaliadwy o wneud ffilmiau. Bydd hefyd yn cynnig hyfforddiant cyfochrog trwy Goleg y Cymoedd gyda’r dechnoleg hon.

Dywedodd Eliot Gibbins a Brett Meader:

“Rydyn ni’n falch iawn o fod yn rhan o’r fenter hon ac yn edrych ymlaen at ddod ag arbedion effeithlonrwydd i’r diwydiant yn ogystal â helpu i gau’r bwlch rhwng addysg a’r gweithle.”

Prosiectau Cronfa Sbarduno 2025 a ariannwyd: 

Bright Branch Media ltd: Footage Finder – Llyfrgell archif symudol ddeinamig a chwiliadwy ar gyfer Gwneuthurwyr Ffilm sy’n cael ei phoblogi gan wneuthurwyr ffilm 
Eliot Gibbins: Sganio 3D rhatach a gwyrddach ar gyfer VFX Ar-Set mewn Ffilm a Theledu yng Nghymru 
Solitaire.io: Adrodd straeon trochol trwy Gardiau Chwarae wedi’u trwytho gan AR 
Hangry Animals Ltd: Gêm-Chwarae Cydweithredol ar gyfer Effaith Gymdeithasol 
João Saramago: Symffonas 
Lily Pad Films Ltd: Cysylltu: Cysylltiadau Cymreig: 
Mathew David: Archwilio Anghenion Pobl Greadigol o’r Dosbarth Gweithiol: Llwybr at Arloesedd a Chynhwysiant yng Nghymru 
Ruth Lloyd: Brycheiniog Digital Biennale 
Straeon Sgrin: Mapiau Sain Ambisonic Hygyrch (AAM’s) gan ddefnyddio Sain Realiti Rhithwir (VRA) 
Stephen Banbury: BeOne 
Sudd: Radio Sudd: Ymchwil a Datblygu ar gyfer Gorsaf Radio Rhyngrwyd Ddwyieithog Gyntaf Cymru 
Sullie Burgess: Sullie Burgess 
Tom Mummford: Chwyldroi Troslais: Addasu a ffynnu gyda Deallusrwydd Artiffisial ar gyfer Llwyddiant yn y Dyfodol 
Yeti: Deallusrwydd Artiffisial Corfforol Cadarnhaol

Cylch ariannu olaf Media Cymru fel rhan o’i Ffrwd Arloesedd yw Cronfa Ddatblygu 2025 sy’n targedu prosiectau ymchwil ac arloesi sy’n dangos potensial clir ar gyfer cynnyrch neu wasanaeth diriaethol. Mae ceisiadau ar gyfer y Gronfa Datblygu eleni ar agor tan ddydd Gwener 28 Chwefror.

Neges flaenorol: Galwad cyllid ymchwil a datblygu derfynol Media Cymru, a’r cyfle olaf i arloeswyr yng Nghymru allu gwneud cais am hyd at £50,000

Pob mewnwelediad

Neges nesaf: Atlas Economi Greadigol Cymru - ffordd newydd o fapio’r ecosystem greadigol yng Nghymru  