Media Cymru yn arddangos byd ymdrwythol datblygiadau creadigol arloesol Cymru yn atyniad diwylliannol mwyaf poblogaidd y DU

Mae gan arloesedd creadigol Cymru le canolog yn Outernet London, atyniad diwylliannol mwyaf poblogaidd y DU, wrth i Media Cymru lansio ei flwyddyn arddangos 2026 gan ddangos gweithiau ymdrwythol Cymru am y tro cyntaf ar sgriniau digidol enfawr.

Gosododd yr arddangosiadau cyntaf stiwdios gogledd Cymru ATXR a CreuTech Ltd wrth wraidd un o’r amgylcheddau cyfryngau amser real mwyaf datblygedig o safbwynt technolegol yn y byd.

Datblygwyd prosiectau o’r ddwy stiwdio drwy Gronfa Her Outernet Media Cymru, a grëwyd i wthio crewyr i harneisio galluoedd technolegol y lleoliad wrth ehangu hunaniaeth a dyfodol arloesedd creadigol Cymru.

Aeth Ysgrifennydd Gwladol Cymru ynghyd â ffigurau blaenllaw o bob cwr o’r sector creadigol yng Nghymru a’r DU i ddigwyddiad lansio arddangosfa 2026 Media Cymru.

Wrth agor yr arddangosfa, disgrifiodd yr Athro Sara Pepper, Cyd-gyfarwyddwr Media Cymru, gynnydd y rhaglen drwy egwyddor “gwneud y pethau bach”.

“Rydym yn creu’r amodau lle nad yw creadigrwydd Cymru yn cymryd rhan mewn arloesedd byd-eang yn unig, mae’n ei arwain. Mae Media Cymru yn brawf, pan fydd cymuned o bobl greadigol yn ymrwymo i wneud y pethau bach yn dda, gan gefnogi ei gilydd, arbrofi, cydweithio a buddsoddi mewn syniadau, bod y camau gweithredu hynny’n adeiladu i rywbeth trawsnewidiol.”

Parhaodd drwy annog gwesteion i wneud y canlynol:

“Dod o hyd i bobl ddisglair. Ariannu syniadau gwych. Meithrin partneriaethau sy’n gwthio ffiniau. Yna dangos y creadigrwydd hwnnw i’r byd. Yr hyn rydych chi’n ei weld yma yw arloesedd Cymru sy’n rheoli un o’r llwyfannau digidol mwyaf pwerus yn unrhyw le.”

Roedd y ddau ddarn o waith a ddangoswyd am y tro cyntaf ar sgriniau enfawr adeilad Now Outernet yn esiampl o’r neges hon.

Mae Awen Unbound ATXR yn mynd â chynulleidfaoedd ar daith o gyfyngiad i ryddhad creadigol. Wedi’i bweru gan ddata amgylcheddol go iawn o Gymru a cherddoriaeth a gynhyrchir gan blanhigion, mae’r profiad yn cyfuno golau, sain a dulliau rhyngweithio â’r gynulleidfa i greu tirwedd ddigidol fyw ar draws sgriniau ymdrwythol adeilad NOW.

Yn dilyn y lansiad, dywedodd rheolwr gyfarwyddwr ATXR, Anna Burke:

“Mae’n swrrealaidd dod â’n gwaith i Outernet Llundain – mae wir yn gwneud i chi deimlo mor gysylltiedig â’r bobl greadigol eraill sydd yma, ac mae’n wych.

“Rhoddodd cyllid Media Cymru’r gallu i ni greu. Roedd hi’n braf iawn defnyddio ein profiad a’n creadigrwydd i wneud rhywbeth drosom ni ein hunain.

“Cysyniad ein profiad ymdrwythol yw cysylltu natur â thechnoleg. Roedden ni wir eisiau i bobl allu defnyddio ein technoleg i gysylltu â’r hyn rydyn ni’n ei weld bob dydd, â natur brydferth Cymru. Mae’n anhygoel ei weld ar y raddfa hon, ond yr hyn roeddwn i wrth fy modd ag ef oedd edrych ar bawb yn ei brofi am y tro cyntaf, gweld sut roedd pawb yn rhyngweithio, roedd hynny’n berffaith.”

Mae Artio gan CreuTech yn ailddychmygu chwedl Arthuraidd trwy lens ecolegol a ffeministaidd. Gan ddefnyddio dulliau adnabod ystumiau, delweddau cynhyrchiol a cherddoriaeth wreiddiol, mae cynulleidfaoedd yn cyd-greu chwedl fyw mewn amser real, a gyflwynir yn Saesneg a Chymraeg.

Dywedodd Klaire Tanner, sylfaenydd a chyfarwyddwr creadigol:

“Mae cefnogaeth arloesedd Media Cymru wedi llunio’r prosiect hwn yn ogystal â llunio fy ngyrfa gyfan am y tair blynedd diwethaf hyd at heddiw.

“Roedden ni’n teimlo ei bod hi’n hanfodol adrodd y stori hon nawr, gyda newid hinsawdd a phopeth sy’n digwydd yn y byd, mae hon yn ffordd o adrodd y stori honno heb fod yn rhy amlwg.

“Mae gweithio ar y raddfa hon yn Outernet Llundain yn golygu popeth i ni. Dyma ein cyfle i ehangu, cysylltu â gweddill y byd, a dangos beth allwn ni ei wneud. Rwy’n gobeithio mai dechrau rhywbeth enfawr yw hyn.”

Mae’r arddangosfa’n nodi dechrau blwyddyn o weithgarwch a fydd yn cyrraedd uchafbwynt yn PLAYBACK, gŵyl greadigrwydd ac arloesedd flaenllaw Media Cymru yng Nghaerdydd.

Wrth gloi’r digwyddiad, cyhoeddodd yr Athro Pepper wahoddiad clir i arweinwyr y diwydiant.

“Os cymerwch chi un neges o hyn, dyma hi: Mae pobl greadigol Cymru yn rym. Pan fyddwn yn ymrwymo i wneud y pethau bach yn gyson ac ar y cyd, rydym yn adeiladu rhywbeth a all sefyll ar unrhyw lwyfan yn y byd.”